انا الصايم عن الأشعار
ومقدرشى
ومش عارف أقولِك شعر
بصوم ..
لكنّ اشواقى ما بتصومشى
وما بترحمش
ومش قادر
ادوب ف عنيكى
لإنهُ حرامفى وقت صيام
اعاكس فيكى كالعادة
لأ ..
مينفعشى
ده يبقى حرام
فمش قايل كلام تانى
ومش هرسم خُصل شعرك كما الأطفال
لإنه حرام فى وقت صيام
ومش هسمع رنين صوتك كما الأنغام
ومش هحلف بنور عينك
ولا هسمع دبيب قلبك
ولا هشتاق اشوف الحب فى خدودك
ولا اميل على جبينك
عشان الصوم ما يبوظشى
لكن بصى ..
لو اشتاقتى لأشعارى
وجيت مجنون على بالك
ووصلك لهفتى ونارى
فممكن تسرحى فيا
وهتلاقى احاسيسى تبان فيا
وفى عنيا
وبعد الصوم هنتقابل
ونخلق م الوجود فرحة
وعمر جديد
ويبقى العيد معاد أنسب
عشان نكتب
على الأوراق
"لقانا للأبد هيعيش"
No comments:
Post a Comment